第二十四回 祇怕招冤同行相护 自甘落魄失路谁悲
按：王莲生躺在榻床右首，吸烟过瘾，复调过左首来，吸上三口，渐觉眉低眼合，
像是烟迷。张蕙贞装好一口烟，将枪头凑到嘴边，替莲生把火。莲生摇手不吸。蕙贞轻
轻放下烟枪，要坐起来。莲生一手扳住蕙贞胸脯，说：「耐也吃一筒？。」蕙贞道：「
我覅吃，吃上仔瘾，阿好做生意嗄？」莲生道：「陆里会上？小红一径吃，勿曾有瘾。
」蕙贞道：「小红自然。俚是本事好，生意会做，就吃上仔，也覅紧。倪要像仔俚也好
哉。」莲生道：「耐说小红会做生意，为啥客人也无拨哉嗄？」蕙贞道：「耐怎晓得俚
无拨客人？」莲生道：「我看见俚前节堂簿，除脱仔我，就不过几户老客人叫仔二三十
个局。」蕙贞道：「做仔耐一户客人，再有二三十个局，也就好哉？。」莲生道：「耐
勿晓得，小红也勿过去，俚开消大，爷娘兄弟有好几个人来浪，才靠俚一干仔做生意。
」蕙贞道：「爷娘、兄弟来里小房子里，陆里有几花开消？常恐俚自家个用场忒大仔点
。」莲生道：「俚自家倒无啥用场，就不过三日两头去坐坐马车。」蕙贞道：「坐马车
也有限得势。」莲生道：「价末啥个用场嗄？」蕙贞道：「倪怎晓得俚？」
莲生便不再问，自取烟盘内所剩两枚烟泡，且烧且吸，移时始尽。于是，一手扶住
榻床栏杆，抬身坐起。蕙贞知道是要吸水烟，忙也起身，取一支水烟筒，就在榻床边挨
著莲生肩膀偎倚而坐，装水烟与莲生吸，莲生吸了两筒，复问道：「耐说小红自家用场
大。是啥个用场，耐说说看？。」蕙贞略怔一怔道：「倪是说说罢哉呀，小红自家末再
有啥个用场，耐覅到小红搭去瞎说瞎话。倘然耐说仔啥末，俚祇道倪说仔俚邱话，再拨
俚骂。」莲生笑道：「耐说末哉，我阿去告诉小红。」蕙贞大声道：「教我说啥物事嗄
？耐搭小红三四年老相好，再有啥勿晓得？倒来问倪！」莲生笑而叹道：「耐末真真是
谄头，小红说仔耐几花邱话，耐勿说俚倒罢哉，再要替俚包瞒。」蕙贞也叹道：「勿是
包瞒呀，耐末也缠煞哉！小红有仔爷娘、兄弟，再要坐坐马车，阿是用场比仔倪大点。
」
莲生冷笑丢开。水烟吸罢，蕙贞仍并坐相陪，和莲生美满恩情，温存浃洽，消磨了
好一会，敲过十二点钟，唤娘姨收抬安睡。
蕙贞在枕上又劝莲生道：「小红个人，凶末凶煞，搭耐是总算无啥。俚故歇客人末
也赛过无拨，就不过耐一个人去搭俚绷绷场面。俚勿搭耐要好，再搭啥人要好？前转明
园俚要同耐拚命，倒勿是为别样，常恐耐做仔我，俚搭勿去哉。耐勿去仔，俚阿是要发
极嗄？我倒劝耐，耐搭俚相好仔三四年，也该应摸著点俚脾气个哉；稍微有点勿快活，
耐哝得过就哝哝罢。俚有辰光就推扳仔点，耐也覅去说俚。耐说仔俚，俚勿好来怪耐，
倒说是倪教耐个闲话，倪末结仔俚几花冤家。单是背后骂倪两声倒也罢哉，倘忙台面没
碰著仔，俚末倒覅面孔，搭倪相骂，倪阿要难为情？」
莲生道：「耐说俚搭我要好，陆里会要好嗄？我坎做俚辰光，俚搭我说：『做倌人
也难得势，就不过无拨好客人。故歇有仔耐，故是再好也勿有。难再要去做一户蓦生客
人，定归勿做个哉。』我说：『耐勿做末，就嫁拨我好哉。』俚嘴里末也说是『蛮好』
，一径搭浆下去。起初说要还清仔债末嫁哉，故歇还仔债，再说是爷娘勿许去。看俚光
景，总归勿肯嫁人，也勿晓得俚终究是啥意思。」
蕙贞道：「故倒也无啥别样意思。俚做惯仔倌人，到人家去规矩勿来，勿肯嫁。再
歇两年，年纪大仔点，难末要嫁耐哉。」莲生摇手道：「倘然沈小红要嫁拨我，我也讨
勿起。前两年，三节开消，差勿多二千光景。今年加二勿对哉，还债、买物事同局帐，
一节勿曾到，用拨俚二千多。耐想：我陆里有几花洋钱去用？」蕙贞复叹道：「像倪一
年就一千洋钱也好哉。」莲生再要说时，祇听得当中间内阿巧睡梦中咳嗽声音，遂被叉
断不提。
次日上午，王莲生、张蕙贞初起身，管家来安即来禀说：「沈小红搭娘姨请老爷过
去说句闲话。」蕙贞忙问甚事，莲生道：「陆里有啥闲话？两日勿去仔末，生来要来请
哉？。」蕙贞寻思一会道：「我猜小红定归有点闲话要搭耐说。耐想？？随便啥辰光，
耐一到仔该搭来，俚？就晓得哉。故歇是晓得耐来里该搭，来请耐，就无啥闲话也要想
句把出来说说，噪得耐勿舒齐。耐说阿对？」莲生不答。
比及用毕午餐，吸足烟瘾，莲生方思过去。蕙贞连连叮嘱道：「耐到沈小红搭去，
小红问耐陆里来，耐就说是来里该搭好哉。俚要搭耐说啥闲话，覅紧个末依仔俚一半，
耐就勿依俚，也覅搭俚强，好好交搭俚说。小红个人不过性子粳点，耐说明白仔，俚也
无啥。耐记好仔，覅忘记。」
莲生答应下楼，并不坐轿，带了来安出门，祇见一个小孩子往南飞跑，仿佛是阿珠
的儿子，想欲声唤，已是不及。莲生却往北出东合兴里，由横弄穿至西荟芳里。阿珠早
迎出门首，相随上楼，同到房里。沈小红当自闲坐，手中执著一对翡翠双莲蓬在那里玩
弄。见了莲生，也不起身，祇冷笑道：「倪该搭勿请耐是想勿著个哉，两日天有几花公
事，忙得来一埭也勿来。」莲生佯笑坐下。阿珠接著笑道：「王老爷一请仔倒就来，还
算倪有面孔，勿曾坍台。先生，耐要谢谢我个？。」说著，先绞把手巾，忙将茶碗放在
烟盘里，点起烟灯，说：「王老爷请用烟。」莲生过去，躺在榻床上手，吸起烟来。小
红便道：「同到该搭来，苦煞个？。才是笨手笨脚，无啥人来搭耐装烟。」莲生笑道：
「啥人要耐装烟嗄？』当时阿珠抽空回避。
莲生本已过瘾，祇略吸一口，即坐起来吸水烟。小红乃将翡翠双莲莲给莲生看。莲
生问：「阿是卖珠宝个拿得来看？」小红道：「是呀。我买哉，十六块洋钱，比仔茶会
浪阿贵点？」莲生道：「耐有几对莲蓬来浪，也好哉，再去买得来做啥？」小红道：「
耐搭别人末去买仔，挨著我末就勿该应买哉？」莲生道：「勿是说勿该应买，耐莲蓬用
勿著末，买别样物事好哉。』」小红道：「别样物事再买哉？。莲蓬用末用勿著，我为
仔气勿过，定归要买俚一对，多豁脱耐十六块洋钱。」莲生道：「价末耐拿十六块洋钱
去，随便耐买啥。该个一对莲蓬也无啥好，覅买哉，阿对？」小红道：「倪是人也无啥
好，陆里有好物事拨倪买？」莲生低声做势道：「阿唷，先生客气得来，啥人勿晓得上
海滩浪沈小红先生，再要说勿好！」小红道：「倪末阿算得是先生嗄？比仔野鸡也勿如
？，惶恐哉？，叫先生！」
莲生料想说不过，不敢多言，仍嘿然躺下，一面取签子烧烟，一面偷眼去看小红。
见小红垂头哆口，斜倚窗栏，手中还执那一对翡翠双莲蓬，将指甲掐著细细分数莲子颗
粒。莲生大有不忍之心，祇是无从解劝。
适值外场报说：「王老爷朋友来。」莲生迎见，乃是洪善卿，进房即说道：「我先
到东合兴里去寻耐，说去哉。我就晓得来里该搭。」小红敬上瓜子，笑向善卿道：「洪
老爷，耐寻朋友倒会寻？。王老爷刚刚到该搭来，也拨耐寻著哉。该搭王老爷难得来个
？，一径来里东合兴里。今朝为仔倪请仔了、坎坎来一埭。晚歇原到东合兴去。洪老爷
，耐下转要寻王老爷末，到东合兴去寻好哉。东合兴勿来浪，倒说勿定来里啥场花。耐
就等来浪东合兴，王老爷完结仔事体转去来，碰头哉？。东合兴赛过是王老爷个公馆。
」
小红正在唠叨，善卿呵呵一笑，剪住道：「覅说哉，我来一埭听耐说一埭，我听仔
也厌气煞哉。」小红道：「洪老爷说得勿差，倪是生来勿会说闲话，说出来就惹人气。
像人家会说会笑，阿要巴结。一样打茶会，客人喜欢到俚？去，同得去个朋友讲讲说说
，也闹热点。到仔该搭，听仔倪讨气闲话，才勿对哉，再要得罪朋友。耐说王老爷陆里
想得著到该搭来嗄！」善卿正色道：「小红，覅实概。王老爷做末做仔个张蕙贞，搭耐
原蛮要好，耐也就哝哝罢。耐定归要王老爷勿去做张蕙贞，在王老爷也无啥，听仔耐闲
话就勿去哉。不过我来里说，张蕙贞也苦煞来浪，让王老爷去照应点俚，耐也赛过做好