第五十二回 小儿女独宿怯空房 贤主宾长谈邀共榻
按：琪官、瑶官两人离了拜月房栊，趁著月色，且说且走。瑶官道：「今朝夜头
个亮月，比仔前日夜头再要亮。前日夜头末闹热仔一夜天，今朝夜头一个人也无拨。
」琪官道：「俚？阿算啥赏月嗄，像倪故歇，故末倒真真是赏个月。」瑶官道：「倪
索性到蜿蜒岭浪去，坐来？天心亭里，一个花园通通才看见。该首赏月末最好哉。」
琪官道：「正经要赏月，耐阿晓得哈场花？来里志正堂前头高台浪，有几花机器，就
是个看亮月同看星个家生。有仔家生，连搭仔太阳才好看哉，看仔末，再有几花讲究
。俚？说同皇帝屋里观象台一个样式，就不过小点。』」瑶官道：「价末倪到高台浪
去罢。倪也用勿著俚家生，就实概看看末哉。」琪官道：「倘忙碰著个客人，勿局个
。」瑶官道：「客人才勿来浪呀。」琪官道：「倪还是大观楼去张张孙素兰阿曾困，
故末蛮好。」瑶官高兴，连说：「去？。」
两人竟不转弯归院，一直踅上九曲平桥，遥望大观楼琉璃碧瓦映著月亮，也亮晶
晶的射出万道寒光，笼著些迷蒙烟雾。两人到了楼下，寂静无声，上下窗寮一律掩闭
，里面黑魆魆地，惟西南角一带楼窗系素兰房间，好像有些微灯火在两重纱幔之中。
两人四顾徘徊，无从进步。
琪官道：「常恐困哉？。」瑶官道：「倪喊声俚看。」琪官无语，瑶官就高叫一
声：「素兰先生。」楼上不见接应，却见纱幔上忽然现个人影儿，似是侧耳窃听光景
。瑶官再叫一声，那人方卷幔推窗，望下问道：「啥人来里喊？」琪官听声音正是孙
素兰，搭嘴道：「倪来张耐呀，阿要困哉？」素兰辨识分明，大喜道：「快点上来？
，倪勿困？。」瑶官道：「勿困末，门才关哉？。」素兰道：「倪来开，耐等一歇。
」琪官道：「覅开哉，倪也转去困哉。」素兰慌的招手跺脚。道：「覅去呀，来开哉
呀！」瑶官见其发急，怂恿琪官略俟一刻。那素兰的跟局大姐一层层开下门来，手持
洋烛手照，照请两人上楼。
素兰迎见，即道：「我要商量句闲话，耐两家头困来里覅转去，阿好？」琪官骇
异问故，素兰道：「耐想该搭大观楼，前头后底几花房子，就剩我搭个大姐来里，阴
气煞个，怕得来，困也生来困勿著。正要想到耐搭梨花院落来末，倒刚刚耐两家头来
喊哉。谢谢耐，陪我一夜天，明朝就覅紧哉。」瑶官不敢作主，转问琪官如何。琪官
寻思半日，答道：「倪两家头团来里，本底子也覅紧。故歇比勿得先起头，有点间架
哉。要末还是耐到倪搭去哝哝罢，不过怠慢点。」素兰道：「耐搭去最好哉，耐末再
要客气。」
当下大姐吹灭油灯，掌著灯台，照送三人下楼，将一层层门反手带上，扣好钮环
。琪官、瑶官不复流连风景，引领素兰、大姐径望梨花院落归来。祇见院墙门关得紧
紧的，敲够多时，有个老婆子从睡梦中爬起，七跌八撞开了门。瑶官急问：「阿有开
水？」老婆子道：「陆里再有开水！啥辰光哉嗄，茶炉子隐仔长远哉。」琪官道：「
关好仔门去困，覅多说多话。」老婆子始住嘴。
四人从暗中摸索，并至楼上琪官房间。瑶官划根自来火，点著大姐手中带来烛台
，请素兰坐下。琪官欲搬移自己铺盖，让出大床给素兰睡。素兰不许搬，欲与琪官同
床，琪官祇得依了。瑶官招呼大姐，安顿于外间榻床之上。琪官复寻出一副紫铜五更
鸡，亲手舀水烧茶。瑶官也取出各色广东点心装上一大盘，都将来请素兰。素兰深抱
不安。
三人于灯下围坐，促膝谈心，甚是相得。一时问起家中有无亲人，可巧三人皆系
没爷娘的，更觉得同病相怜。琪官道：「小个辰光无拨仔爷娘，故末真真是苦恼子！
阿哥、阿嫂陆里靠得住？场面蛮要好，心里来？转念头。小干仵勿懂啥事体，上仔俚
？当还勿曾觉著。倘然有个把爷娘来浪，我为啥到该搭来！」素兰道：「一点勿差。
我爷娘刚刚死仔三个月，阿伯就出我个花样，一百块洋钱卖拨人家做丫头。幸亏我晓
得仔，告诉仔娘舅，拿买棺材个洋钱还拨仔阿伯，难末出来做生意。陆里晓得个娘舅
也是个坏坯子，我生意好仔点，骗我五百块洋钱去，人也勿来哉！」
瑶官在旁默然果听，眼波莹莹然要吊下泪来。素兰顾问道：「耐来仔该搭几年哉
？」琪官代答道：「俚乃再要讨气！来个辰光俚个爷一淘同得来，俚自家也叫俚『爷
』。后来我问问俚，啥个爷嗄，是俚慢娘个姘头！」
素兰道：「耐两家头运道倒无啥，才到仔该搭来也罢哉。我个命末生来是苦命，
才说我无拨帮手个勿好，碰著仔要紧事体，独是我一于子发极，再有啥人替我商量商
量？有仔点勿快活，闷来浪肚皮里，也无处去说？。要寻个对景点娘姨、大姐，才难
煞？。」琪官道：「耐也总算称心个哉，比仔倪好多花？。像倪就说是两家头，阿有
啥用场嗄？自家先一点点做勿来主，再要帮别人，生来勿成功。停两年，也说勿定倪
两家头来浪一堆勿来浪一堆。」
素兰道：「说到后底事体，大家看勿见，怎晓得有结果无结果。我想无拨啥法子
，过一日末是一日，碰去看光景。」瑶官插说道：「倪末来里过一日是一日。耐个后
底事体，有点数目来浪。华老爷搭耐好得非凡，嫁得去末，端正享福好哉，阿有啥看
勿见？」素兰失笑道：「耐倒说得写意？。要是实概说起来，齐大人也蛮好？，耐两
家头为啥勿嫁拨仔齐大人嗄？」瑶官道：「耐末说说正经就说到仔歪里去！」琪官点
头道：「闲话倒也是正经闲话，总归做仔个女人，大家才有点说勿出个为难场花，外
头人陆里晓得？单有自家心里明白。想来耐华老爷好末好，终勿能够十二分称心阿对
？」
素兰抵掌道：「耐个闲话故末蛮准，可惜我勿是长住来里，住来里仔同耐讲讲闲
话，倒无啥。」瑶官道：「故也陆里说得定？倪出去也勿晓得，耐进来也勿晓得，耐
说个『碰去看光景』。」琪官道：「我说大家闲话对景仔，倒勿是定归要来浪一堆；
就勿来浪一堆，心里也好像快活点。」素兰闻言，欣然倡议道：「倪三个人索性拜姊
妹阿好？」瑶官抢说：「蛮好，拜仔末大家有照应。」
琪官正待说话，祇听得外面历历碌碌，不知是何声响。琪官胆小，取祇手照拉同
瑶官出外照看。那月早移过厢楼屋脊，明星渐稀，荒鸡四叫，院中并无一些动静。两
人各处兜转来，却惊醒了榻床上大姐，迷糊著两眼，问是「做啥」。两人说了，大姐
道：「下头来浪响呀。」说著，果然历历碌碌响声又作，乃班里女孩儿睡在楼下，起
来便遗。
两人呼问明白，放心回房，随手掩上房门，向素兰道：「天要亮哉，倪困罢。」
素兰应诺。瑶官再请素兰用些茶点，收拾干净，自去间壁自己房间睡下。琪官爬上大
床，并排铺了两条薄被，请素兰宽衣，分头各睡。
素兰错过睡性，翻来覆去睡不著；听琪官寂然不动，倒是间壁瑶官微微有些鼻声
。俄而，一祇乌鸦哑哑叫著，掠过楼顶。素兰揭帐微窥，四扇玻璃窗倏变作鱼肚白色
，轻轻叫琪官不答应，索性披衣起身，盘坐床中。不想琪官并未睡著，仅合上眼养养
神，初时不应，听素兰起坐，也就撑起身来，对坐攀话。
素兰道：「耐说倪拜姊妹阿好？」琪官道：「我说勿拜一样好照应，拜个啥嗄？
要拜末今朝就拜。」素兰道：「好个，今朝就拜。那价个拜法？？」琪官道：「倪拜
姊妹，不过拜个心。摆酒送礼多花空场面，才用勿著，就买仔副香烛，等到夜头，倪
三个人清清爽爽，磕几个头末好哉？。」素兰道：「蛮好，我也说写意点好。」
琪官见天已大明，略挽一挽头发，跨下床沿，趿双拖鞋，往床背后去。一会儿，
出来净过手，吹灭梳妆台上油灯，复登床拥被而坐，乃从容问素兰道：「倪拜仔姊妹
，赛过一家人，随便啥闲话才好说个哉。我要问耐，倪看个华老爷无啥？，为仔啥勿
称心嗄？」素兰未言先叹道：「覅说起，说起仔末真真讨气。俚乃个人倒勿是有啥个
勿称心，我同俚样色样蛮对景，就为仔一样勿好。俚乃个人做一百桩事体末，定归有
九十九桩勿成功？。有点干己个事体，俚乃生来勿肯做。就教俚做桩小事体，俚乃要
四面八方通通想到家，是覅紧个，难末再做。倘然有个把闲人说仔一声勿好，就勿做